ҰЛТТЫҚ МӘДЕНИЕТІМІЗДІҢ АЛТЫН ҚАЗЫНАСЫ –

ТЕАТР МАЙТАЛМАНДАРЫМЕН РУХАНИ-ТАНЫМДЫҚ КЕЗДЕСУ

Жастар санасына ұлттық құндылықтарды сіңіру, ұлтқа риясыз қызмет етудің үлгісін көрсету, ұлттық мәдениет пен өнер арқылы тәлім-тәрбие беру мақсатында Шәкәрім гимназиясында еліміздің басты өнер шаңырағы, Мұхтар Әуезов атындағы Қазақ ұлттық драма театрының актері, Қазақстанның еңбек сіңірген қайраткері, Мемлекеттік "Дарын" жастар сыйлығының лауреаты, Бауыржан Момышұлы атындағы "Намыс" орденінің иегері, "Алаш арыстарының ізбасары" төсбелгісінің, "Құрмет" орденінің иегері театр және кино өнерінің көрнекті өкілі, өзіндік қолтаңбасын қалыптастырған сахна шебері Бекжан Тұрыспен және дарынды жас актер Әлсейіт Есбатыровпен «Ұлттық өнер мен мәдениет – тұлға тәрбиелеудің құдіретті күші» тақырыбында рухани-танымдық кездесу өтті.

Асқақ арқа жұртының ішінде осындай алтын қазына тұлғаларды іздейтін, пір тұтатын, әрине, жастар жағы. Сондықтан сыр-сұхбат форматында өткізілген танымдық-рухани кездесуге жиналған Шәкәрім жастары мен педагогтер қауымы арқа-жарқа болып, көкейлерінде жүрген ой-толғамдарымен бөлісті, ел алдында жүрген, ұлтымыздың маңдайына біткен өнер майталмандарына сұрақ-сауалдарын қойып, рухани тұрғыда бір саты жоғарылады деуге келеді. Бұл, ерекше асқақ рух беретін, кездесу барысында танымал өнер майталмандары ұлтжандылық, елжандылық үлгілерін паш етті. Әрбір пайымдары ұлттық сана мен ұлттық құндылықтарды дәріптеуді үйретті, ұлтқа риясыз қызмет ету жолдарын айқындап берді. Оның ішінде аса зер салатын тұсы – төл әдебиетіміздің маңызы мен берері туралы, театр өнері арқылы рухани кемелдену бағыттары жайлы тұңғиық терең мәселе көтеріп, Шәкәрім жастарына ой салды, ұлттық құндылықтар дәнегін септі.

«Еркін микрофон» шеңберінде қойылған жастардың сауалдары да мазмұны мен маңызы тұсынан тұшымды, зерлі-зерделі болып, құрметті қонақтарымыздың жоғары бағасын алып үлгерді. Сонымен қатар, төл мәдениетіміздің классикалық туындысы «Еңлік-Кебек» трагедиясын осы өнер шеберлерінің қатысумен тамашалаған жастарымыз тамсанып көргендерін, тәлім-тәрбиелік нәр алғандарын да жеткізіп, риясыз, балалық сезімге толы алғыстарын білдіріп жатты.

Осы орайда, ұлағаты таусылмас әлем, Әуезов Мұхтар кемеңгердің пайымы санаға оралады: «Театр – сымбатты өнердің ішіндегі ең зор өнердің бірі». Осы зор өнеріміз дамып, әрдайым жастар санасын зерлейтін, әрлейтін, тәлімі мен тәрбие әлемі болып, құдіретті күші сарқылмай, мәңгілік жасасын!