“Кітап оқитын ұлт” жобасы аясында Әлімхан Ермеков атындағы мектеп-лицейінің ұстаздары Джеймс Клирдің “Атом әдеттер” кітабын талдады. «Атом әдеттер» кітабы – күнделікті өмірде шағын, бірақ жүйелі өзгерістер енгізу арқылы үлкен нәтижеге жетудің тиімді жолдарын ұсынатын мотивациялық еңбек. Автордың негізгі идеясы – табыс бір сәттік үлкен қадамнан емес, күн сайын қайталанатын 1% жақсартудан құралады.
Кітапта әдет қалыптастырудың төрт заңы қарастырылады: әдетті айқын, тартымды, оңай және қанағаттанарлық ету. Жақсы әдеттерді дамыту үшін орта мен жүйенің рөлі ерекше екені көрсетіледі, ал жаман әдеттерді азайту үшін оларды қиын әрі көзге түспейтін ету ұсынылады.
Ұжыммен талқылау барысында бұл кітап әріптестерге жеке даму, кәсіби тиімділік, уақытты басқару және командалық мәдениетті жетілдіру тұрғысынан пайдалы ой салуға мүмкіндік береді. «Атом әдеттер» ұжым мүшелерін ортақ мақсатқа жету жолында біртіндеп, бірақ тұрақты алға жылжуға ынталандырады.