СПОРТ ЖӘНЕ ДЕНЕ ТӘРБИЕСІ – ДЕНСАУЛЫҚ КЕПІЛІ

Жас өрендердің болашағына сеніммен қарап, зор үміт артамыз. Ал сол болашақ жастардың денсаулығына байланысты. Ұлтымыз ежелден бала тәрбиесіне, оның ішінде баланың денсаулығына ерте кезден көңіл бөлген. Оған дәлел - ұлттық спорттық ойындар. Жас кезінен шыныққан жасөспірім шымыр, епті, икемді болып өскен.

Қазіргі уақытта спорт — қоғамдағы жалпы мәдениеттің бір бөлігі, адамның дене қабілеттерін дамыту мен денсаулығын нығайтуға бағытталған әлеуметтік қызметтің бір саласы. Жастардың жан-жақты дамуын спортсыз елестету мүмкін емес. Бір сөзбен айтқанда, спорт – тәрбиенің бір саласы. Дене тәрбиесі соның құрамдас бөлігі, дәлірек айтсақ бастапқы баспалдағы.

Осыған орай Шәкәрім гимназиясында ауқымды түрде ДЕНСАУЛЫҚ КҮНІ өткізілді.

Биылғы ДЕНСАУЛЫҚ КҮНІНДЕ, барлық буын оқушыларын қамтыған тәрбиелік іс-шарада, «Дене шынықтыру» пәні мұғалімдерінің спорт пен дене тәрбиесі, салауаты өмір сүру қағидалары туралы тұшымды дәрістерінен кейін әртүрлі спорттық ойындар, күштік жаттығулар мен эстафеталар жалғасын тапты.

Бұл іс-шараның басты мақсаты – салауаты өмір салтын қалыптастыру, спорт пен дене тәрбиесі мәселелерін насихаттап, дені сау, жігері жанылған, ақыл-ойы ұшқыр ұлт болашағын тәрбиелеу.

Бірінші байлық — денсаулық, ал сол денсаулықтың кепілі — спорт пен дене тәрбиесі.