М.Жұмабаев атындағы №39 гимназияда 15 жыл бұрын тәрбие үрдісінде ата – ана мен ұстаздың, оқушының арасында ынтымақтастықпен тәрбие алмасатын «Шырақ» ата – аналар университеті өз жұмысын бастаған болатын. Бүгінгі күні дәстүрлі түрде өтетін тәлім – тәрбие орталығына айналып отыр.

       Университет алғашқы отырыстарын гимназиямыз атымен аталатын ақын, ағартушы – педагог Мағжан Жұмабаевтың өмірімен, шығармашылығымен танысудан бастады. Одан бала тәрбиесіндегі ата – ана мен ұстазға жол сілтейтін ұлы еңбегі «Педагогикасының» кәусар бұлағынан сусындады.

       Мағжанның педагогикасының және психологиялық ой – пікірлері ұлттық тәрбиеге етене жақын, сондықтан халқымыздың атадан балаға мұра ретінде ауысып, тәрбиелік, өнегелік қасиетімен игі қызмет атқарып келе жатқан халықтық педагогика тақырыптарымен ұштасты.

          Биылғы оқу жылындағы отырыстың тақырыбы: «Әке, Ана үш – ақ әріп тіршіліктің, үш әріптен үлбірейді гүл шығып»  деп аталды.

      Мақсаты: Отбасы тәрбиесінде ата – ананың балаға тәрбиелік ықпалын арттыру. Тәрбиенің ең тамаша жері – отбасы екенін, ата – ананың бала тәрбиесіндегі алатын орнын, жеке тұлғаның оқу – тәрбиеге жауапкершілігін арттыра отырып, мектеп пен ата – ана арасындағы байланысты арттыру.

         Отырыс ұзаққа созылды және қызықты өтті. Ата – ана көп жиналды. Өз ойларындағы ұсыныс – тілектерін білдірді.