«Заң және тәртіп» акциясы аясында, «Мен – болашақ полицеймін» тақырыбы бойынша мектеп жанындағы «Достық» сауықтыру алаңының оқушылары Юго-Восток аудандық полиция бөлімшесіне барды.

Экскурсия барысында полиция қызметкерлері балаларды бөлімшенің жұмысымен таныстырып, кезекші бөлім мен қабылдау бөлмесін көрсетті. Сонымен қатар оқушыларға арнайы құрал-жабдықтар көрсетіліп, олардың қолданылу аясы жан-жақты түсіндірілді. Сондай-ақ, қызметтік қару-жарақтармен таныстырды.

Полиция қызметкерлері жолда және қоғамдық орындарда қауіпсіздік ережелерін сақтау, заңға бағыну және жеке жауапкершілік туралы түсіндіру жұмыстарын жүргізді. Сонымен қатар, буллинг пен құқық бұзушылықтың алдын алу тақырыптары қозғалды.

Іс-шара соңында оқушыларға буллингке қарсы және полиция қызметкерлерінің ерліктері туралы бейнероликтер көрсетіліп, бұл балаларға үлкен әсер қалдырды. Оқушылар ерекше әсерде оралды.